എണ്ണതീർന്ന
നിലവിളക്കിൽ,സന്ധ്യക്ക്
കരിന്തിരി കത്തും മണം
ചുട്ടുപൊള്ളുന്നൊരു നെഞ്ചിൽ
കണ്ണുനീരിറ്റു വീണുരുകും
മണം
അരിവേവും മണം
അറിയാതെ തിളച്ചുതൂവിയ
പാൽ മണം
കാവികടലാസുറയിൽ
ആഴ്ച്ചതോറുമെത്തും
വേവലാതിനിറഞ്ഞ കത്തിൽ
വേദന വേവും മണം
കാറ്റിൽ
നെഞ്ചിലെ മുറിവിലൂടെ
വ്യഥയുടെ നിശ്വാസമുതിർക്കും
മുളങ്കാട് പൂക്കും മണം
വാകപൂ വീണു തണുത്ത
കുളത്തിലെ
പായൽമണം
ഒടുവിലെന്നിട്ടും
അമ്മയെയോർക്കുമ്പോൾ
ഉള്ളിൽ
എരിഞ്ഞടങ്ങുന്നൊരു ചിത നിറയുന്നു
ചുറ്റും
അമ്മയുടെ മണം പരക്കുന്നു
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ