പ്രണയം

നിന്റെ പ്രണയം
എനിക്ക് വേദനയാണ്
വ്യൂഫൈൻഡറിലൂടെ
ഞാനവരെ നോക്കിയില്ല
നരച്ച ഓർമകളുടെ
ശിരോവസ്ത്രക്കീഴിൽ
നനഞ്ഞ മിഴിത്തിളക്കം
ഞാനിഷ്ടപ്പെടുന്നില്ല

ഒന്നിനുമല്ലാതെ
നിനക്കെന്നെ
ഇഷ്ടപ്പെടാമോ
എന്റെ സാമീപ്യത്തിനും
തീ പിടിച്ച ഉടലിനുമല്ലാതെ
നിനക്കെന്നെ
പ്രണയിക്കാമോ

മെലിഞ്ഞ വിരലുകൾക്കിടയിൽ
എന്റെ വിറയ്ക്കുന്ന മൗനം
അവർ പൊതിഞ്ഞു വെച്ചു
അടഞ്ഞ മിഴികൾക്കു മീതെ
നനവുള്ള ഒരു ചുംബനം കൊണ്ട്
പച്ചകുത്തി

നിനക്ക് പ്രണയം
ഒരുപാധിയാണ്
സ്വപ്നങ്ങൾ തിന്നു മടുത്ത
രാത്രികളിൽ
ഏകാന്ത നിദ്രാടനങ്ങളിൽ
കയ്ക്കുന്ന ജീവനും
തപ്തമായ യാത്രകളും
വേട്ടയാടുമ്പോൾ
നീയോടിയൊളിക്കുന്ന
ഒരിടം
പ്രണയം
നിനക്കൊരു
ഒളിച്ചോട്ടം മാത്രമാണ്