അയാളും മരിച്ചു
കവലയിലെ ഫ്ലെക്സിൽ
അയാളുടെ പഴയ ഫോട്ടോ
ഉള്ളിൽ കോറി വലിക്കുന്ന നോട്ടം
കണ്ണുകളിൽ ഇപ്പോഴുമുണ്ട്
ഇന്ന് വൈകീട്ടാണ് ശവമെടുപ്പ്
വേണമെങ്കിൽ പോകാം
നല്ലതും ദുഷ്‌ട്ടും പറയുന്നവർക്കിടയിൽ നിന്ന്
ഒന്നുകൂടി അയാളെ കാണാം
പതം പറഞ്ഞുള്ള കരച്ചിൽ കേൾക്കാം
പൂക്കൾക്കും റീത്തുകൾക്കും
ഇടയിലൂടെ
അടഞ്ഞ കണ്ണിലൂടെ
ഉള്ളുകൊത്തി വലിക്കുന്ന ഒരു നോട്ടം
കാത്തിരിക്കുന്നുണ്ടാവും
ചുണ്ടിന്റെ കോണിൽ
കരച്ചിലിന്റെ തുമ്പിൽ കെട്ടിയ
ഒരു ചിരിയും
വാക്കുകൾ ഇപ്പോഴും
ചിതറിയ മൗനത്തിന്റെ
ചില്ലൊച്ഛകൾ പോലെ
അയാളുടെ പിടിവിട്ടു
എവിടെയൊക്കെയോ
അലയുകയാവും

വേണമെങ്കിൽ പോകാം
കാത്തിരിപ്പിന്റെ ഭാവം
അയാൾക്ക് കാണാൻ വേണ്ടി
കൺകോണിൽ പുരട്ടി
വേണമെങ്കിൽ പോകാം
ഇപ്പോഴെങ്കിലും.