മഴ പെയ്യാത്ത വേനലിനുച്ചിയിൽ
അവളുടെ സ്പർശം
തീയായെരിയുന്നു
പ്രണയം നിരസിച്ച പെണ്ണിന്
നീല ഞരമ്പുകളിലെ
ഉന്മാദം മാത്രം
കോൺടാക്റ്റ് ലെൻസ് മാറ്റുമ്പോൾ
അവളുടെ മിഴികളിൽ
കിനാവിന്റെ കടലു വറ്റുന്നു
പാതിരാത്രിയിൽ
പാതവിളക്കിന്റെ മഞ്ഞനിലാവിൽ
തണുത്തൊരുടലിന്റെ
ശവസ്പർശത്തിൽ
പൊട്ടിയൊലിക്കുമ്പോൾ
രാത്രിക്ക്
ജമന്തിപ്പൂമണം
വേച്ചു പോകുന്നൊരു നിഴലിന്റെ
അടിവസ്ത്രമുരിയുമ്പോൾ
കറുത്ത രക്തത്തിന്റെ
വസന്തഗ്രന്ഥി മുറിയുന്നു

തിരിച്ചെത്തുമ്പോൾ
നിനക്ക്
മോർച്ചറിയുടെ ഇരുണ്ട മൗനവും ഗന്ധവും